„მოვიწოდებთ ხელისუფლებას, დაიწყოს ნარკოპოლიტიკის ფუნდამენტური რეფორმა“ | რა სისტემურ ხარვეზზე მეტყველებს ზურა ნიჟარაძის საქმე
თბილისში 11 ნოემბერს ნარკოტიკების ფლობის ბრალდებით კიდევ ერთი ახალგაზრდა, ზურა ნიჟარაძე დააკავეს. მას აღკვეთის ღონისძიების სახით პატიმრობა უკვე შეეფარდა.
პროკურატურა ნიჟარაძეს 1.4628 გრამი MDMA-ის, 0.000105 გრამი LSD-ს, 4.76617 გრამი კეტამინის ფლობას ედავება.
საქართველოს კანონმდებლობის მიხედვით, ეს ოდენობები დიდ და განსაკუთრებით დიდ ოდენობებში ხვდება. კერძოდ, 260-ე მუხლის მე-6 ნაწილში, რაც განსაკუთრებით დიდი ოდენობით ნარკოტიკული საშუალების ფლობას ითვალისწინებს და ისჯება 8-დან 20 წლამდე ან უვადო თავისუფლების აღკვეთით.
ნიჟარაძის მხარდასაჭერად სოციალურ ქსელში კამპანიაც დაიწყო. ადამიანები, ვისაც მიაჩნია, რომ ნიჟარაძეს სახელმწიფო უსამართლოდ ეპყრობა, საპროცესო შეთანხმების იმედად თანხას აგროვებენ.
ნიჟარაძეს სოლიდარობა გამოუცხადეს საქართველოში მოქმედმა კლუბებმაც - KHIDI, „კიბე“, Mzesumzira, Left Bank.
KHIDI: „საქართველოში არსებული მკაცრი ნარკოპოლიტიკა დიდი სირთულის წინაშე აყენებს მისი მოქალაქეების ცხოვრებას. ზურა ნიჟარაძე ამ პოლიტიკის სამწუხარო მაგალითს წარმოადგენს და მის მიმართ ასეთი შეუსაბამო პოლიტიკის გატარება ხაზს უსვამს სამართლებრივ სისტემაში არსებულ სისტემურ უსამართლობას.
ნარკოპოლიტიკის განზრახ მკაცრი ხასიათი გამოიხატება მის არაპროპორციულ სასჯელში, რომლის მიხედვითაც, ზურას 8-დან 12 წლამდე ან უვადოდ თავისუფლების აღკვეთა ემუქრება პირადი მოხმარებისთვის განკუთვნილი ნარკოტიკული საშუალებების შენახვისათვის. ამგვარი მკვეთრი შეუსაბამობა სადამსჯელო ღონისძიებისა აჩენს ადამიანის ღირსების შელახვის განცდას”.
Mzesumzira: „მოვუწოდებთ ყველა პასუხისმგებელ პირს, ერთხელ და სამუდამოდ გაიაზრეთ რომ ადამიანის დასჯაზე ორიენტირებული ნარკოპოლიტიკა არ მუშაობს და იწვევს უარეს შედეგებს.
გაიაზრეთ - არ შეიძლება საკუთარი პოლიტიკური მიზნებისთვის ადამიანების ციხეში გამომწყვდევა“.
„კიბე“: „ზურა ნიჟარაძის საქმე კიდევ ერთი ნათელი მაგალითია იმისა, რომ ხელისუფლება მოქმედ ნარკოპოლიტიკას არა საზოგადოებრივი სიკეთის, არამედ საკუთარი პოლიტიკური მიზნებისთვის იყენებს და მხოლოდ ხალხის დასჯაზეა ორიენტირებული.
ამასთანავე, ნარკოტიკის ის რაოდენობა, რაც ზურას აღმოაჩნდა, მხოლოდ პირადი მოხმარებისთვისაა და არ შეესაბამება ბრალდებას, რომელიც მის წინააღმდეგაა წარდგენილი და 8-დან 20 წლამდე თავისუფლების აღკვეთას მოიაზრებს“.
„დაიწყოს მოქმედი ნარკოპოლიტიკის ფუნდამენტური და რეალური რეფორმა”
ნიჟარაძის საქმეს ასევე გამოეხმაურნენ საქართველოში ნარკოპოლიტიკის სფეროში მომუშავე ორგანიზაციები და დღის წესრიგში კიდევ ერთხელ დადგა სისტემური პრობლემების მოგვარების საჭიროება.
„საქართველოში ნარკოტიკულ დანაშაულებზე სახელმწიფოს რეაგირება არსებითად დასჯაზე და რეპრესიაზეა ორიენტირებული. ხშირად, მძიმე სასჯელების სუბიექტები ნარკოტიკული საშუალებების მომხმარებლები ხდებიან, რომლებიც ნივთიერებას პირადი მოხმარების მიზნით ფლობდნენ. საქართველოს პენიტენციურ დაწესებულებებში განთავსებულ პირთა თითქმის 24% სასჯელს სწორედ ნარკოტიკული დანაშაულისთვის იხდის, რაც კიდევ ერთხელ უსვამს ხაზს ქვეყანაში ნარკოტიკულ ნივთიერებებთან მიმართებით სახელმწიფო პოლიტიკის არსებითი ცვლილების აუცილებლობას.
ნარკოტიკული დანაშაულებისთვის გათვალისწინებულ მაღალ სასჯელებს ხშირად სახელმწიფოს წარმომადგენლები ქმედების მაღალი საზოგადოებრივი საფრთხით ხსნიან. თუმცა, ნარკოტიკულ საშუალებებთან ასოცირებული გამოწვევები მხოლოდ სისხლის სამართლის რეგულირების სფეროს არ უნდა წარმოადგენდეს და განხილულ უნდა იქნას საზოგადოებრივი ჯანდაცვის ჭრილში. სახელმწიფო უნდა ზრუნავდეს ნარკოტიკული საშუალებების მოხმარებასთან (და პირადი მოხმარების მიზნით ფლობასთან) გასამკლავებლად საჭირო მხარდაჭერის სერვისების შექმნასა და დახვეწაზე და ამ პროცესში ადამიანის უფლებებზე ორიენტირებული, მტკიცებულებებზე დაფუძნებული პოლიტიკის გატარებაზე.
მოვუწოდებთ პროკურატურას, მხედველობაში მიიღოს ბრალდებულის პიროვნება, საქმის გარემოებები და სამართლიანი პირობებით გააფორმოს ზურა ნიჟარაძესთან საპროცესო შეთანხმება.
ამავდროულად, აღნიშნული საქმე კიდევ ერთხელ აჩვენებს მოქმედი რეპრესიული ნარკოპოლიტიკის რამდენიმე მწვავე პრობლემას:
1. მკაცრი სასჯელები – გასაღების მიზნის არარსებობის პირობებში, მაღალია თავისუფლების აღკვეთის ქვედა ზღვარიც კი, რაც ცხადყოფს, რომ ნარკოპოლიტიკა კვლავ დასჯაზეა ორიენტირებული.
ზოგ შემთხვევაში ნარკოტიკის პირადი მოხმარების მიზნით შენახვა შეიძლება უფრო ხანგრძლივი ვადით თავისუფლების აღკვეთას ითვალისწინებდეს, ვიდრე ისეთი ძალადობრივი დანაშაულები, როგორიცაა: განზრახ მკვლელობა (10-დან 15 წლამდე) ან გაუპატიურება (6-დან 8 წლამდე).
2. უსამართლო ოდენობები – საქართველოში ნარკოტიკული საშუალებების ოდენობები უსამართლოდაა გაწერილი. დაბალია როგორც სისხლის სამართლის დანაშაულისთვის საწყისი, ისე დიდი და განსაკუთრებით დიდი ოდენობის ზღვარი. ამგვარი განაწილება ობიექტურად მცირე ოდენობის ნარკოტიკული საშუალების შენახვასაც სისხლის სამართლის ჩარჩოებში აქცევს, რაც პირად ცხოვრებაში ხისტ ინტერვენციასა და პიროვნების თავისუფალი განვითარების უფლების შელახვას იწვევს.
- აღმასრულებელმა და საკანონმდებლო ხელისუფლებამ უზრუნველყოს ნარკოტიკული დანაშაულისთვის გათვალისწინებული სასჯელებისა და უფლებების შემზღუდველი დამატებითი მექანიზმების გადახედვა და შემსუბუქება;
- საქართველოს პარლამენტმა საკონსტიტუციო სასამართლოს გადაწყვეტილებების აღსრულების მიზნით, სისხლის სამართლის კოდექსში განახორციელოს შესაბამისი საკანონმდებლო ცვლილებები;
- საკონსტიტუციო სასამართლომ ოპტიმალურ ვადაში განიხილოს ნარკოტიკულ დანაშაულებთან და ადმინისტრაციულ სამართალდარღვევებთან დაკავშირებული კონსტიტუციური სარჩელები და წარდგინებები.
- საერთო სასამართლოებმა უსამართლო და არაპროპორციული სასჯელის დანიშვნის ნაცვლად გამოიყენონ საკონსტიტუციო სასამართლოსთვის წარდგინებით მიმართვის მექანიზმი”, – ნათქვამია განცხადებაში.
